[ حتى انت كمان .. ]

              إلى [ محمد عبد المعطي ]

    شعر : درويش الأسيوطي

[ استغفر الله     من دموع راسي

  الموت حقيق  بس الفراق قاسي ] [ من المراثي الشعبية ]

………………………

ياه .. يا محمد عبد المعطي ..

حتى انت كمان ؟!!

طبْ قلنا [ حجَّاج الباي ]

خلَّص حكايات البحر ..

وزي عاداته ..

اتسرسب من بين صوابعنا

                        ومات  ..!!

والواد [ فاعوص التايه ]

لملم رمان الحلم

                ف قفة عمره ..

ونطِّ من القَطْر الماشي

                        وفات ..!!

و[ محمد نصر ياسين ] .. استعجل

كان ناوي يكمِّل ف السيرة ..

لكن لما لقى الأبطال أكاذيب ..

والدنيا بتضيق .. حرجم  .. وقزح بحصانه

من أول بوابه  .. وهات  ..!!

حتى عمك [ شوقي ..  أبو ناجي]

اللي عاش طول عمره يضحَّكنا ..   علينا ..

         يبدو ـ والعالم ربك ـ  استخسر فينا الضحكة

                        راح ولا قال سلامات .. 

……………………………

لكن انت يا محمد عبد المعطي ..؟!!

طب ليه ؟

ياه يا محمد عبد المعطي  ..!!

طب مين يا محمد

        هيطب علينا .. غيمة شعر

وينطَّر على كل القاعدين ياسمين ؟!!

مين يا محمد مين .. ؟

مين غيرك ..

يبدر ف حجورنا اللولي ..

وكانه بيبعتر ف شوية فول ..!!؟

معقوله يا محمد ؟ معقول ؟

من غير ما تشاور يا محمد .. ؟

                من غير ما تقول .. ؟

                دي برضه أصول ؟!!

طب كنت استنى شوبه..

                لما أحط دماغي..

المدهول .. المذهول ..

ما انت كنت بتستنى لما أغفل ..

وتلم الشبان حواليك ..

وتقول ..

ياه يا محمد عبد المعطي ..

        حتى انت كمان ..

لا .. مش معقول ..